മുംബൈ. കാല്വിരലിനേറ്റ പരുക്കുമൂലം സച്ചിന് തെന്ഡുല്ക്കര്ക്ക് ഇന്ത്യന് പ്രീമിയര് ലീഗിലെ പല കളികളും നഷ്ടമായേക്കുമെന്ന് അഭ്യൂഹം; സച്ചിനു കുഴപ്പമില്ലെന്നും ഐപിഎല്ലില് ഉടനീളം കളിക്കുമെന്നും മാസ്റ്റര് ബ്ലാസ്റ്റര് നയിക്കുന്ന മുംബൈ ഇന്ത്യന്സിന്റെ വിശദീകരണം പിന്നാലെ. സച്ചിന് കഴിഞ്ഞദിവസം ലണ്ടനിലേക്കു പോയതിനെത്തുടര്ന്നായിരുന്നു അഭ്യൂഹങ്ങളുടെ പിറവി.
കാല്വിരലിലെ പരുക്കു പരിശോധനയ്ക്കു വിധേയമാക്കാനാണ് സച്ചിന് ലണ്ടനിലേക്കു പോയതെന്നും 31ന് തിരിച്ചെത്തുമെന്നും മുംബൈ ഇന്ത്യന്സ് വക്താവ് അറിയിച്ചു. ചെന്നൈയില് ഏപ്രില് മൂന്നിനു നടക്കുന്ന ഉദ്ഘാടനച്ചടങ്ങിലും നാലിനു നിലവിലുള്ള ചാംപ്യന്മാരായ സൂപ്പര് കിങ്സിനെതിരെയുള്ള ഉദ്ഘാടന മല്സരത്തിലും സച്ചിന് കളിക്കുമെന്നും മുംബൈ ടീം വിശദമാക്കി.
ലണ്ടനില് പരിശോധനയ്ക്കു പോയ സച്ചിന് എന്നു തിരിച്ചെത്തുമെന്നു വ്യക്തമല്ലെന്നും പരുക്കു ഭേദമാക്കാന് ശസ്ത്രക്രിയ വേണ്ടിവന്നേക്കുമെന്നും ബിസിസിഐ വൃത്തങ്ങളെ ഉദ്ധരിച്ചു റിപ്പോര്ട്ട് വന്നതിനെത്തുടര്ന്നാണ് ഊഹാപോഹങ്ങള് ശക്തമായത്.
ഏറെനാളായി വലയ്ക്കുന്ന പരുക്കിനു ശസ്ത്രക്രിയ വേണ്ടിവന്നാല് സച്ചിന് ഐപിഎല്ലില് കളിക്കാനാകുമോ എന്നും ചോദ്യങ്ങളുയര്ന്നു.
ഈയിടെ രാജ്യാന്തര ക്രിക്കറ്റില്നിന്നു വിരമിച്ച രാഹുല് ദ്രാവിഡിന് ബിസിസിഐ മുംബൈയില് സച്ചിന്റെ വീടിനടുത്ത് കഴിഞ്ഞദിവസം ഒരുക്കിയ സ്വീകരണച്ചടങ്ങില് സച്ചിന്റെ അസാന്നിധ്യം ശ്രദ്ധിക്കപ്പെട്ടിരുന്നു.
ഒരു ദശാബ്ദത്തോളം പഴക്കമുള്ള പരുക്കിനു പരിഹാരംതേടി ചടങ്ങിനു മുന്പുതന്നെ സച്ചിന് ലണ്ടനിലേക്കു യാത്ര തിരിച്ചിരുന്നു.
0 അഭിപ്രായ(ങ്ങള്):
ഒരു അഭിപ്രായം പോസ്റ്റ് ചെയ്യൂ